Бүгінгі педагогикалық кеңес: Болашаққа бағыт

27 тамыз, мектебімізде жаңа оқу жылы қарсаңында маңызды педагогикалық кеңес өтті. Жиынға "Өрлеу" біліктілікті арттыру ұлттық орталығы" акционерлік қоғамының Қостанай облысы бойынша Кәсіби даму институты" филиалының директоры Мусабекова Гульвира Айдархановна және қалалық білім бөлімінің әдіскерлері қатысып, құнды пікірлерімен бөлісті.

Педагогикалық кеңестің күн тәртібінде келесі маңызды мәселелер талқыланды:

• Мектептің стратегиялық дамуы және "Келешек мектептері" жобасы аясындағы жаңа бағыттар.
• Білім беру процесін ұйымдастырудың негізгі аспектілері.
• "Адал азамат" біртұтас тәрбие бағдарламасының мәселелері.
• Жасанды интеллект (ЖИ) мүмкіндіктері. Соның ішінде бастауыш сыныптарда ЖИ-ді қолданудың маңыздылығы мен ағылшын тілі сабағындағы жаңа тәсілдер қарастырылды.
• "Педагог мәртебесі – сапалы білім кепілі" тақырыбы аясында мұғалімдердің кәсіби дамуы.
• "Академиялық адалдық: білімнің негізі мен болашағы" мәселесі.

Жиын барысында мектептің алдағы даму стратегиясы, оқу-тәрбие процесіндегі жаңашылдықтар, оның ішінде жасанды интеллектті тиімді қолдану жолдары жан-жақты талқыланды. Бұл кеңес мектебіміздің ұжымы үшін жаңа оқу жылына дайындықтың маңызды кезеңі болды.

Кеңес соңында барлық педагогтар жаңа оқу жылына үлкен сеніммен және тың серпінмен қадам басуға дайын екендіктерін көрсетті.

Ашық есік күні: біздің болашағымыз – біздің мектебіміз!

28.08.2025 жылы Қостанай қаласының № 31 мектебі ашық есік күнін өткізіп, қонақтарды жоғары көңіл күймен қарсы алды. Оқушылардың ата-аналары мен қала тұрғындары мектеппен және педагогтармен таныса келе, балаларға жасалған жағдайларды өз көздерімен көріп, сұрақтарын қоюға мүмкіндік алды.

«Келешек мектептері» ұлттық жобасы аясында 2025 жылғы

15 қаңтарда есігін айқара ашқан жаңа мектеп — бұл жай ғана білім ордасы емес, бұл болашаққа көшбасшыларды тәрбиелейтін орталық.

Жобалық қуаттылығы 1200 оқушыға арналған бұл мектеп, бүгінде 1000-нан астам оқушы үшін білім мен ұлттық құндылықтардың үйлесімі жарасқан ордаға айналды.

«Келешек мектептері» жобасының заманауи техникалық жабдықталуы ХХІ ғасырдың негізгі дағдыларын: аналитикалық ойлау мен IT-құзыреттіліктен бастап зерттеу және шығармашылық қабілеттерге дейін қалыптастыруға жағдай жасайды.

Салынып жатқан мектептер заманауи талаптарға сай интерактивті және пән кабинеттерімен жабдықталған, оқушылардың жан-жақты дамуына ықпал ететін жарқын дизайнымен ерекшеленеді.

Биология, физика, химия және информатика пәндік кабинеттерінде, STEM-зертханада барлығы оқушылардың зерттеу қабілеттерін дамытуға және білім сапасын арттыруға бағытталған.

Мектебіміздің ең басты байлығы – жаңа оқу жылына толық дайын 66 білікті педагог. Олардың әрқайсысы оқушыларға сапалы білім беруге, олардың бойындағы талантты ашуға және жан-жақты дамуына үлес қосуға дайын.

Мектептегі барлық оқушылар қосымша білім берумен толық қамтылған. Олардың арасында заманауи робототехника үйірмесінен бастап, қазақ халқының салт-дәстүрі мен мәдениетін терең ұғынуға бағытталған этно-бағыттағы сабақтарға дейін бар.

Жайлы коворкинг-аймақтар, белсенді және тыныштықта демалуға арналған орындар, мемлекеттік тілдегі кітаптардың үлкен қоры бар заманауи кітапхана және екі спорт залы оқушылардың жан-жақты дамуына жасалған.

Оқушының бойында ұлттық құндылықтарды қалыптастыруға, халқымыздың салт-дәстүрлеріне, тіліне және мәдениетіне деген құрмет пен сүйіспеншілікті дарытуға ерекше көңіл бөлінеді.